Ադրբեջանը շարունակում է մերժել Հայաստանի առաջարկները. Միրզոյան
ՀՀ ԱԳ նախարարը Բրազիլիայի ԱԳ նախարարի հետ հանդիպման արդյունքներով հայտարարության մեջ անդրադարձել է նաև Ադրբեջանին ուղղված ՀՀ առաջարկներին, որոնք, Միրզոյանի հաղորդմամբ, շարունակում են մերժվել ադրբեջանական կողմից․
«Տարածաշրջանային հաղորդակցությունների ապաշրջափակման վերաբերյալ մենք Ադրբեջանին ներկայացրել ենք շատ կոնկրետ առաջարկներ, որոնք, եթե կյանքի կոչվեն, կարող են հնարավորություն տալ սկզբում երկաթուղու գործարկմանը, ապա նաև ստեղծել լայն հնարավորություններ հաղորդակցությունների ընդլայնման համար»,- նշել է ԱԳ նախարարը։
Միրզոյանի փոխանցմամբ՝ ՀՀ կողմից հնչեցված առաջարկները դրական արձագանք չեն ստացել․
«Ցավոք, առաջարկները չեն ստացել կառուցողական պատասխան Ադրբեջանից. մենք դեռևս չունենք դրական արձագանք հաղորդակցությունների և սպառազինության վերահսկման վերաբերյալ առաջարկների առնչությամբ»,- ասել է նախարարը։
