Բելառուսը մտադիր չէ հարձակվել Ուկրաինայի վրա. Լուկաշենկո
Բելառուսը մտադիր չէ հարձակվել Ուկրաինայի վրա: Այս մասին հայտարարել է Բելառուսի նախագահ Ալեքսանդր Լուկաշենկոն։
«Այո, սահմանը (բելառուսա-ուկրաինական) այնտեղ շատ խիստ բարիկադացված է, ամենուր ականապատված է: Նրանք երկար ժամանակ վախենում էին, որ մենք կներքաշվենք այս պատերազմի մեջ»,- ասել է Լուկաշենկոն Օլգա Սկաբեևայի հետ հարցազրույցում։ Նրա խոսքերն ուրբաթ օրը մեջբերել է պետական BelTA լրատվական գործակալությունը։
«Մենք հստակորեն հետևում ենք դեպի խաղաղություն տանող տենդենցին։ Եվ մենք հիմա Ուկրաինայի վրա հարձակվելու պլաններ չունենք։ Դա նույնիսկ անազնիվ կլինի մեր կողմից»,- ընդգծել է Բելառուսի նախագահը։
Նա նաև ասել է, որ Ուկրաինան առաջարկել է Բելառուսի տարածքում ռուս և ուկրաինացի ռազմագերիների համար ճամբարներ ստեղծել։
«Նրանք նախատեսում էին Բելառուսի տարածքում ճամբարներ ստեղծել, որտեղ ռազմագերիները կպահվեն: Դա Ուկրաինայի առաջարկն էր. մենք (Բելառուս) վերահսկում ենք այդ ճամբարները, գերի ընկած ուկրաինացիները գնում են ճամբար, ռուսները՝ ճամբար»,- ասել է Լուկաշենկոն։
«Բայց մենք ոչ մի դիրքորոշում չենք ընդունում, մենք համոզվում ենք, որ դրանք լավ են, ապահովված են, ստուգվում են, վիրավորներին օգնություն է ցուցաբերվում և այլն»,- հավելել է Բելառուսի նախագահը։
Լուկաշենկոյի խոսքով՝ ուկրաինական կողմը հայտարարել է այս նախագիծը ֆինանսավորելու պատրաստակամության մասին։ «Ես ասում եմ՝ այդ դեպքում երկրորդը. համաձայնության եկեք ռուսների հետ, եկեք համաձայնության, մենք ուրախ կլինենք ձեզ օգնել»,- ասաց նա։
