Ինչ վիճակում են ձնահյուսի հետևանքով տուժող անձիք
Արագած լեռան հյուսիսային գագաթին տեղի ունեցած ձնահյուսի հետևանքով տուժել է 8 անձ: Հանրապետական շտապօգնության ծառայության աշխատախմբերի ուղեկցությամբ տուժածները հոսպիտալացվել են:
ՀՀ առողջապահության նախարարությունից հայտնում են, որ բժիշկների կողմից նախնական ախտորոշվել է պոլիտրավմաներ (միջին և թեթև):
ՀՀ ՆԳՆ-ն տեղեկացնում է, որ Արագածում տուժած լեռնագնացներն Իսպանիայի քաղաքացիներ են։ Նրանցից մեկը շարունակում է մնալ անհետ կորած։
Հիշեցնենք, որ մարտի 11-ին՝ ժամը 15:26-ին, Արագածոտնի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Արագած լեռան հյուսիսային գագաթին տեղի է ունեցել ձնահյուս․ 9 անձից բաղկացած արշավախումբը մնացել է ձնահյուսի տակ, 8 անձ դուրս է եկել, իսկ 1-ն անհետ կորել է։
Ձնահյուսի հետևանքով անհետ կորած անձի որոնողափրկարարական աշխատանքներին ներգրավվել է երկու ուղղաթիռ։
