Զորակոչիկների բուժհետազոտության տվյալները կթվայնացվեն. Պապիկյան
Զինապարտ քաղաքացիների առողջական վիճակի հետազոտման և բժշկական փորձաքննության իրականացման գործընթացում կարգավորում են քաղաքացու առողջական վիճակի վերաբերյալ տվյալներն էլեկտրոնային համակարգ մուտքագրելու, ուղեգրումների գործընթացը էլեկտրոնային համակարգով իրականացնելու հարաբերությունները: Այս մասին հայտարարել է պաշտպանության նախարար Սուրեն Պապիկյանը՝ ներկայացնելով հերթական որոշման նախագիծը։
Վերջինիս խոսքով՝ կարգավորմամբ զինկոմիսարիատներից առողջապահական համակարգի կազմակերպություններին զինապարտ քաղաքացիների վերաբերյալ տեղեկությունը տրվում է «ArmMed» համակարգով և հետազոտությունների արդյունքները հետ են ստացվելու միայն թվային տարբերակով, իսկ լաբորատոր գործիքային ախտորոշման տվյալները պետք է ներբեռնվեն ArmMed համակարգ և պահպանվեն 10 տարի, որում պետք է ներբռնվեն նաև քաղաքացու ամբուլատոր քարտի տվյալները:
Պապիկյանը հայտարարեց, որ ընթացիկ զորակոչի ժամանակ 1800 զորակոչիկ ուղարկվել է կրկնակի հետազոտության և օրենքի փոփոխմամբ 90%-ով այդ թիվը կարող է կրճատվել. «Այսինքն դրա հարակից բոլոր հետազոտությունները պարտադիր կարվեն և այլևս հարց չի առաջանա, թե ինչ հիվանդության ինչ աստիճանում է գտնվում զորակոչիկը:
Կատարվող փոփոխությունները հնարավորություն կտան մինչև զորակոչային տարիքը հայտնաբերել հավանական հիվանդությունները և նախաձեռնել նպատակային բուժման գործընթաց, քաղաքացու վերաբերյալ ստանալ թվային առողջապահական տվյալներ, ունենալ առողջական հետազոտությունների հետագծելիությունը, որը ամենակարևոր հանգամանքներից մեկն է, դրանով իսկ ապահովելով գործընթացի արդյունավետությունը»,- ասել է Պապիկյանը:
