Հութիները հայտնել են ամերիկյան MQ-9 Reaper ԱԹՍ–ն խոցելու մասին

«Անսար Ալլահ» իսլամիստական խմբավորման հութիները Եմենի Ալ Բեյդա նահանգի երկնքում խոցել են ամերիկյան MQ-9 Reaper անօդաչու թռչող սարքը։ Այս մասին հայտարարել է ապստամբների կողմից ստեղծված զինված ուժերի ներկայացուցիչ Յահյա Սարիան, գրում է ТАСС–ը։

«Եմենի հակաօդային պաշտպանության ուժերին հաջողվել է խոցել ամերիկյան MQ-9 անօդաչու թռչող սարքը, որը թշնամական առաքելություններ էր իրականացնում Ալ Բեյդա նահանգի օդային տարածքում», - ասել է շարժման խոսնակը, որի հայտարարությունը հեռարձակել է հութիներին պատկանող Al Masirah հեռուստաալիքը: 

Սարիայի խոսքով՝ Մերձավոր Արևելքում լարվածության սրման սկզբից ապստամբները ոչնչացրել են այս տեսակի ամերիկյան 13 անօդաչու թռչող սարք։ ԱՄՆ Կոնգրեսի հետազոտական ​​ծառայության տվյալներով՝ յուրաքանչյուր սարքի արժեքը գնահատվում է 30 մլն դոլար։

Գազայի հատվածում հակամարտության սրումից հետո «Անսար Ալլահը» նախազգուշացրել է, որ հրթիռակոծելու է Իսրայելը և թույլ չի տա հարակից նավերին անցնել Կարմիր ծովի ջրերով և Բաբ ալ-Մանդեբի նեղուցով մինչև պաղեստինյան անկլավում գործողությունների դադարեցումը: Անցյալ տարվա նոյեմբերից հութիները հարձակվել են Կարմիր ծովում և Ադենի ծոցում տասնյակ քաղաքացիական նավերի վրա։