ԵԽ ղեկավար Շառլ Միշելը լիազորությունները փոխանցեց Անտոնիո Կոստային
Եվրոպական խորհրդի ղեկավար և Բելգիայի նախկին վարչապետ Շառլ Միշելը իր լիազորությունները փոխանցել է Պորտուգալիայի կառավարության նախկին ղեկավար Անտոնիո Կոստային։ Այս մասին նոյեմբերի 29-ին հայտնել է Եվրոպական խորհրդի մամուլի ծառայությունը։
Պորտուգալացին այս պաշտոնում կսկսի աշխատել դեկտեմբերի 1-ից, երբ պաշտոնը ստանձնի Եվրահանձնաժողովի երկրորդ կազմը, որի ղեկավարը կմնա Ուրսուլա ֆոն դեր Լայնը։
Հանձնման արարողությունը տեղի է ունեցել Եվրոպական խորհրդի Բրյուսելյան նստավայրում։ Միշելը Կոստային մաղթել է «պահպանել Եվրամիության միասնությունը»։ Միևնույն ժամանակ, նա այս պաշտոնում իր գլխավոր ձեռքբերումներից է անվանել զենքի զանգվածային մատակարարումները Կիևին և ԵՄ-ի կողմից հակառուսական պատժամիջոցների սահմանումը։
