Թուրքիան արգելել է լրագրողի մուտքը երկիր, նա մեկնել էր Երևանից․ մանրամասներ

Թուրքիան արգելել է կանադացի լրագրող Նիլ Հաուերի մուտքը երկիր։ Այս մասին լրագրողը հայտնել է X-ի իր էջում։

Նա գրել է, որ Թուրքիա էր մեկնել Երևանից՝ զբոսաշրջության նապատակով, սակայն իրեն բերման են ենթարկել և տեղեկացրել, որ գտնվում է «սև ցուցակում»։ Հաուերը նշում է, որ 16 ժամ անց իրեն Ստամբուլի օդանավակայնից հետ են ուղարկել Հայաստան։

«Ես ոչ մի հանցանք չեմ գործել», - գրել է լրագրողը և նշել, որ կբողոքարկի մուտքի այս արգելքը։ 

Լրագրողը Թուրքիայի այս քայլը կապել է իր մսնագիտական գործունեության հետ՝ չբացառելով, որ այն իրագործված լինի Բաքվի պահանջով։

«Ես հազվադեպ եմ հաղորդում Թուրքիայի մասին, չեմ անդրադառնում քրդական կամ գյուլենական հարցերի, որովհետև արտասահմանցի լրագրողներն այնտեղ խնդիրներ են ունենում: Ես կասկածներ ունեմ, որ այս արգելքը կատարվել է Ադրբեջանի խնդրանքով կամ առնվազն ներգրավվածությամբ։ Ես լայնորեն լուսաբանել եմ Լեռնային Ղարաբաղում Ադրբեջանի գործունեության և Ալիևի վարչակարգի կողմից իրականացված էթնիկ զտումների մասին», - գրել է նա։

Պաշտոնական Անկարան ու Բաքուն չեն արձագանքել լրագրողի հայտարարություններին։

Միևնույն ժամանակ ադրբեջանական լրատվամիջոցները գրում են, թե «Հաուերը հայտնի է Ղարաբաղյան երկրորդ պատերազմին վերաբերող իր միակողմանի հրապարակումներով։ Նրա նյութերը, որպես կանոն, ողողված էին Ադրբեջանին ուղղված մեղադրանքներով՝ անտեսելով հայկական կողմի օկուպացիոն քաղաքականությունը»։