Բրյուսովի ռեկտորը 59 աշխատակցի է ազատել աշխատանքից
Դավիթ Գյուրջինյանը Վալերի Բրյուսովի անվան պետական համալսարանի ռեկտոր նշանակվելուց ի վեր 59 աշխատակցի ազատել է աշխատանքից։ Այս մասին «Փաստինֆոյի» հետ զրույցում ասել է համալսարանի նախկին պրոռեկտոր Ցոլակ Ակոպյանը։ Նրա խոսքով` աշխատանքից ազատված աշխատակիցներից մոտ 40-ը դասախոսներ են։
«Հիմա չեմ կարող ասել` փոխարինողներ կարողացել է գտնել, թե ոչ։ Եթե անգամ գտել են, ոչ պրոֆեսիոնալ դասախոսներ են։ Օրինակ` անցած տարի Գյուրջինյանը հայոց լեզվի լավագույն մասնագետներին ուղղակի ազատեց աշխատանքից՝ զուգահեռ դառնալով նաև հայագիտության ամբիոնի վարիչ։ Այսինքն` մինչև այսօր նա և՛ համալսարանի ռեկտորն է, և՛ ամբիոնի վարիչ, ինչի իրավունքը չունի»,–ասել է Ակոպյանը։
Նրա խոսքով` Գյուրջինյանը ամբիոնի վարիչ դառնալուց հետո մի շարք փորձառու դասախոսների պարզապես ժամ չի տվել։
Ակոպյանն ընդգծել է, որ ռեկտորը որևէ դասախոսի աշխատանքից ազատելու դեպքում ո՛չ մասնագիտական, ո՛չ կարգապահական հարց առաջ չի քաշում, հիմնավորումն այն է, որ պայմանագիրը լրացել է, և ռեկտորը նոր պայմանագիր չի կնքում։
«Նման կերպ է լուծում տալիս խնդրին։ Եթե պետական համալսարանի դեպքում հարցը միայն քաղաքական է, դասախոսները ազատվում են հենց քաղաքական հայացքների համար, ապա Բրյուսովի դեպքում և՛ քաղաքական հայացքներն են պատճառը, և՛ անձնական վրեժխնդրություն է։ Աշխատանքից մարդիկ են ազատվում, որոնք նրան քննադատել են ապօրինի նշանակման գործընթացի հետ կապված, որոնք, օրինակ, 7 տարի առաջ նրան ամբիոնի վարիչ չեն ընտրել»,–ասել է նախկին պրոռեկտորը։
Հիշեցնենք` Դավիթ Գյուրջինյանը Բրյուսովի անվան համալսարանի ռեկտոր է ընտրվել 2024 թվականի մարտին։
