ԱԺ ընտրություններին քվեարկելու համար կպահանջվի առնվազն մեկ տարվա բնակություն Հայաստանում

Ազգային ժողովը երկրորդ ընթերցմամբ և ամբողջությամբ ընդունել է ՀՀ ընտրական օրենսգրքում փոփոխություններ կատարելու մասին նախագիծը։

Այս օրենսդրական փոփոխությունների համաձայն՝ ԱԺ ընտրությունների և հանրաքվեների ժամանակ քվեարկությանը մասնակցելու իրավունք կունենան միայն ՀՀ այն քաղաքացիները, ովքեր վերջին երկու տարվա ընթացքում ավելի քան մեկ տարի (730 օրից 366 օրը) բնակվել են Հայաստանում։ Բացի այդ, ընտրություններին մասնակցելու հնարավորություն ստանալու համար ՀՀ քաղաքացին պետք է Հայաստան ժամանի ընտրություններից 48 օր առաջ, իսկ արտահերթ ընտրությունների պարագայում՝ 28 օր առաջ։

Նախագծի հեղինակներն են իշխող «Քաղաքացիական պայմանագիր» խմբակցության պատգամավորներ Ալխաս Ղազարյանը, Արուսյակ Մանավազյանը, Հասմիկ Հակոբյանը և Արուսյակ Ջուլհակյանը:

Օրենսդրական փոփոխություններն ուժի մեջ կմտնեն պաշտոնական հրապարակմանը հաջորդող օրվանից: