200 հազար դրամի փոխարեն՝ 400 հազար․ փոփոխություններ՝ ԱՊՊԱ-ի կանոններում
Հայաստանի Ավտոապահովագրողների բյուրոն իր կանոններում փոփոխություններ է կատարել։
«Ինչպես գիտեք, ճանապարհատրանսպորտային պատահարների հետևանքով Երևան քաղաքում հաճախակի խցանումներ են առաջանում՝ անհարմարություններ պատճառելով Ձեզ։ Նշված խնդրի թեթևացման նպատակով Հայաստանի Ավտոապահովագրողների Բյուրոն իր կանոններում կատարել է հետևյալ փոփոխությունները.
Երևան քաղաքում տեղի ունեցած ապահովագրական պատահարների գծով համաձայնեցված հայտարարագիրը բջջային հավելվածի միջոցով լրացվելու դեպքերի համար կրկնակի բարձրացվել է փոխհատուցման ենթակա գումարի առավելագույն սահմանաչափը՝ 200.000 ՀՀ դրամի փոխարեն սահմանվելով 400.000 ՀՀ դրամ։
Համաձայնեցված հայտարարագրով կարգավորվող դեպքերից տարբերվող դեպքերի համար ապահովագրական ընկերությունների վրա դրվել է պարտավորություն՝ վարորդների հետ հեռախոսային խոսակցության ժամանակ մատչելի եղանակով ներկայացնել իրենց պարտավորություններն ապահովագրական պատահարի վայրում։
Լիահույս ենք, որ կատարված փոփոխությունները կնվազեցնեն խցանումները՝ բարձրացնելով երթևեկության ընդհանուր արդյունավետությունը, ինչպես նաև բարելավելով երթևեկության հոսքը։
Վերոհիշյալ փոփոխություններն ուժի մեջ կմտնեն սույն թվականի սեպտեմբերի 18-ին»,- նշվում է հաղորդագրության մեջ։
Auroranews-ն ավելի մանրամասն տեղեկություն ստանալու համար կապ հաստատեց փաստաբան Արտակ Խաչատրյանի հետ։
Նա հայտնեց՝ խոսքը վերաբերվում է փոքր վթարներին (քերծել, հայելի վնասվել և այլն)։ Որպեսզի վարորդները ոստիկանություն չկանչեն, երկկողմանի համաձայնության դեպքում, տվյալ հավելվածով նկարում են վթարը և ուղարկում ապահովագրական ընկերությանը, այնուհետև մեքենաները հեռացնում տարածքից։
«Եթե այդ հավելվածով նկարում ուղարկում էին, առավելագույնը 200 հազար դրամ էր ակնկալվում, հիմա, ըստ հաղորդագրության, փոխհատուցման ենթակա գումարի առավելագույն սահմանաչափն այդ 200 հազար դրամի փոխարեն դարձել է մինչև 400 հազար դրամ, այսինքն մինչև 400 հազար դրամի վնաս կրած վթարների դեպքում, եթե երկու կողմերը համաձայնության են գալիս, նկարում են վթարն, ուղարկում ու ճանապարհը բացում»,- մեզ հետ զրույցում նշեց փաստաբանը։
