Ավիավթար Չիլիում․ զոհվել են օդաչուն և վեց ուղևորներ

Չիլիի հարավում փոքր ինքնաթիռի կործանման հետևանքով զոհվել են օդաչուն և վեց ուղևորներ։ Այս մասին հայտնում է երկրի քաղաքացիական ավիացիայի վարչությունը։

«Ժամը 15:00-ին Վիլլա Սերրո Կաստիլյո գյուղի մոտ գտնվող Լոս Օրկետաս հատվածում հայտնաբերվել է Transportes Aereos San Rafael ընկերության Piper Navajo ինքնաթիռը, որի հետ կապը կորել է։

Տխուր միջադեպի հետևանքով զոհվել է օդաչուն և նրա վեց ուղևորները»,- ասվում է հաղորդագրության մեջ։

Դեպքի պատճառները պարզելու համար վարչությունն ուղարկել է մասնագետներ։ Ինչպես հայտնում է BioBio ռադիոկայանը, ողբերգության պահին լեռնային շրջանում անբարենպաստ կլիմայական պայմաններ են եղել։ Ինքնաթիռը մարզային մայրաքաղաք Էյսեն Կոյհայկեից ուղեւորվում էր Չիլի Չիկո քաղաք, որը գտնվում է Արգենտինայի հետ սահմանին։