ԵՄ-ն պատժամիջոցներ է սահմանել 28 բելառուսցիների նկատմամբ

Եվրամիությունը 28 բելառուսցիների է ավելացրել իր պատժամիջոցների ցուցակում՝ երկրում «շարունակվող ներքին բռնաճնշումների և մարդու իրավունքների ոտնահարման» մեջ նրանց դերակատրման համար: Այս մասին հայտնում է ԵՄ Խորհրդի մամուլի ծառայությունը։

Պատժամիջոցները նախատեսում են ակտիվների սառեցում, ԵՄ տարածքով մուտքի և տարանցման արգելք, ինչպես նաև ԵՄ քաղաքացիներից և ընկերություններից ֆինանսական աջակցության տրամադրման արգելք:

Իրավապաշտպան կազմակերպությունները վկայում են, որ տասնյակ հազարավոր բելառուսցիներ ենթարկվել են «քաղաքական բռնաճնշումների» 2020 թվականին նախագահական ընտրություններում Լուկաշենկոյի հաղթանակից հետո։

Արևմուտքը և ընդդիմադիր քաղաքական գործիչներն այդ ընտրությունները կեղծված էին որակել։