Օդանավակայանում վեճի և ծեծկռտուքի պատճառով չորս անձ է ձերբակալվել

Հուլիսի 30-ին «Զվարթնոց» օդանավակայանի ուղևորների հաշվառման հատվածում Երևան-Սոֆիա չվերթի հաշվառման ժամանակ քաղաքացիների միջև վեճ է ծագել՝ նստատեղերի վերաբերյալ հարցի շուրջ։ Վեճի ընթացքում հայհոյանքներ են հնչեցրել միմյանց հասցեին, փոխադարձ հարվածներ հասցրել, խոչընդոտել օդանավակայանի աշխատակիցների բնականոն աշխատանքին։ ՀՀ ՔԿ-ից «Փաստինֆո»-ի հետ զրույցում հայտնեցին, որ դեպքը տեղի է ունեցել երեկոյան։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 297-րդ հոդվածի 2-րդ մասի 1-ին կետի՝ մի խումբ անձանց կողմից խուլիգանության և 195-րդ հոդվածի 2-րդ մասի 5-րդ կետի՝ մի խումբ անձանց կողմից ներգործության հատկանիշներով։

«Չորս անձ է ձերբակալվել, ներկայացվել վարույթն իրականացնող մարմնին, որոնց հետ կատարվել են առաջնային, անհետաձգելի քննչական գործողություններ և անձինք արգելանքից ազատ են արձակվել։ Նախաքննությունը շարունակվում է»,- նշեցին ՔԿ-ից։