Պապոյանը՝ Արցախի գործարարներին աջակցելու մասին
Այո, մարդը կորցրել է ինչ-որ բան, հյուրանոց է կորցրել, բայց եթե հիմա ձեր առաջարկն է պետբյուջեով հյուրանոց կառուցենք, իրանց տանք՝ անհնար է: Այս մասին ասուլիսին հայտարարել է Էկոնոմիկայի նախարար Գևորգ Պապոյանը՝ անդրադառնալով այն հարցին, թե Արցախի գործարարներին ի՞նչ աջակցություն են ցուցաբերում, որոնք կորցրել են ամեն ինչ։
Նախարարը նշել է, որ ՀՀ կառավարությունը հսկայածավալ՝ «տասնյակ միլիարդավոր դրամների» աջակցության ծրագրեր է իրականացրել արցախահայերի համար։
«Բիզնեսի աջակցության բազմաթիվ ծրագրեր ունենք։ Ցավոք, մեր պետության հնարավորությունները սուղ են, և հավասար մրցակցության և հնարավորությունների համադրության արդյունքում, թերևս, մեր առաջարկն է ԼՂ գործարարներին՝ օգտվեն առկա առաջարկներից։ Եթե կան բիզնես գաղափարներ՝ պատրաստ եմ ընդունել, քննարկել, թե ավելի կոնկրետ ինչ կարող ենք անել, և մեր գործող ծրագրերից օգտվեն»,-ասել է նա։
Նախարարը նշել է, թե աշխարհի զարգացած երկրներու 100 000 փախստականի դեպքում, միշտ հայտնվում են վրանային քաղաքներ, ճամբարներ. «Բայց մեր երկրում նման ոչ մի իրավիճակ չի եղել»։
