Գազալցակայանի պայթյունից տուժած քաղաքացիներից մեկի կյանքը չի հաջողվել փրկել, մյուսի վիճակը ծայրահեղ ծանր է
Գազալցակայանում պայթյունի հետևանքով տուժած քաղաքացիներից մեկի կյանքը, ցավոք, չհաջողվեց փրկել։ Այս մասին լրագրողների հետ զրույցում հայտնեց առողջապահության նախարար Անահիտ Ավանեսյանը:
«Բժիշկներն ամեն կերպ պայքարում են, իրականացվել են թե՛ վիրահատական, թե՛ այլ միջամտություններ։ Մյուս պացիենտի վիճակը ևս շարունակում է մնալ ծայրահեղ ծանր։ Իրականացվում են բոլոր անհրաժեշտ միջամտությունները»,- նշեց նա:
Նախարարի խոսքով՝ միջին ծանրության այրվածքներ ստացած մնացած բուժառուների մոտ դրական դինամիկա կա։
«Նրանք կշարունակեն բուժական ընթացքը, բայց կարող ենք հանգիստ լինել իրենց համար: Ծայրահեղ ծանր վիճակում գտնվող երկու քաղաքացիները, որոնցից մեկի կյանքը փրկել չի հաջողվել, ստացել էին խորը այրվածքներ»,- ասաց Անահիտ Ավանեսյանը:
