Երևանում օդի աղտոտվածությանը հնարավոր կլինի հետևել առցանց

Երևան քաղաքում տեղադրված օդի որակի չափիչ սարքերից ստացված տվյալներով և ներդրված Guality պորտալի հնարավորություներով մշակել ենք «Օդի փոշով աղտոտվածության ցուցանիշների» տեղեկատվական հարթակ: Այս մասին այսօր՝ հունիսի 3-ին, Երևանի քաղաքապետարանի գործակարգավարական խորհրդակցության ժամանակ ասաց Երևան քաղաքի կառավարման տեխնելոգիաների կենտրոն ընկերության տնօրեն Սարգիս Մանուկյանը։

Նա հայտնեց, որ այսօր հարթակը կհրապարակվի Yerevan.am կայքում, որում երևում է մայրաքաղաքում տեղադրված օդի մաքրության սենսորների տեղադիրքերը և դրանց գրանցած արդյունքները։

Մանուկյանը բացատրեց, որ հարթակում երևացող մինչև 12 միկրոգրամ փոշին 1 մ³ օդում համարվում է ոչ վտանգավոր, 12-35 միկրոգրամը՝ միջին ցուցանիշն է և 35-ից ավելը փոշու պարունակության բարձր ցուցանիշն է։

Քաղաքապետ Տիգրան Ավինյանն էլ ասաց, որ փոշու սենսորներ տեղադրվելու են բոլոր վարչական շրջաններում և վերահսկվելու է շինարարական գործունեություն իրականացնողների աշխատանքը, իսկ բնակիչները կարող են ցանկացած պահի ծանոթանա մայրաքաղաքի օդի որակին։