2024 թվականի սկզբից ՌԴ զորքերը վերահսկողության տակ են վերցրել երկրի «նոր շրջանների» 547 քառակուսի կիլոմետր տարածք։ Այս մասին հայտարարել է պաշտպանության նախարար Սերգեյ Շոյգուն Ռուսաստանի զինված ուժերի ղեկավարության հետ սելեկտորային խորհրդակցության ժամանակ։

Շոյգուն նաև նշել է ուկրաինական բանակի կորուստների թվերը։ Նրա խոսքով՝ Ուկրաինայի զինված ուժերի կորուստներն ապրիլին աճել են օրական մինչեւ հազար մարդու, իսկ 2024 թվականի սկզբից ընդհանուր առմամբ գերազանցել են 111 հազարը եւ 21 հազար միավոր սպառազինությունն ու ռազմական տեխնիկան: Պաշտպանության նախարարի մեկնաբանության մեջ չի հստակեցվում ՝ նկատի ունեն միայն անդառնալի կորուստները, թե վիրավորների հետ սպանվածները:

Ուկրաինայի զինված ուժերի մեծ կորուստները Շոյգուն բացատրել է նրանով, որ ԱՄՆ-ն ու նրա դաշնակիցները Ուկրաինայից պահանջում են թույլ չտալ պաշտպանության փլուզում և ամեն գնով զսպել ռուսական զորքերի հարձակումը:

Բացի այդ, ինչպես հայտարարել Է Շոյգուն խորհրդակցության ժամանակ, վերջին երկու շաբաթվա ընթացքում ռուսական զորքերը գրավել են Դոնեցկի մարզի երեք բնակավայր՝ Նովոբախմուտովկա, Սեմյոնովկա և Բերդիչի: