Հայտնի է՝ քանի թևավոր հրթիռ և ԱԹՍ է Իրանն արձակել Իսրայելի ուղղությամբ

Կիրակի գիշերը Իրանն Իսրայելի ուղղությամբ արձակել է 185 անօդաչու թռչող սարք և 36 թևավոր հրթիռ՝ ի պատասխան Իսրայելի զինվորականների կողմից Դամասկոսում իրանական հյուպատոսության գնդակոծության: Նման տվյալներ է տարածել The New York Times թերթը ՝ վկայակոչելով իսրայելցի պաշտոնյաներին։ Տեղեկատվությունը փոխանցում է RG.ru-ն:

Նրանք պնդում են, որ արձակումների մեծ մասն իրականացվել է Իրանի տարածքից, փոքր քանակությամբ ԱԹՍ-ներ են արձակվել Իրաքից և Եմենից:

Նշվում է նաև, որ Իրանը «Երկիր-երկիր» դասի 110 հրթիռ է արձակել, փոխանցում է ՏԱՍՍ-ը:

Ավելի վաղ Իսրայելի պաշտպանության բանակի ներկայացուցիչ Դանիել Հագարին հայտնել էր, որ Իսրայելի հակահրթիռային պաշտպանության համակարգը կարողացել է որսալ իրանական հրթիռների և անօդաչու թռչող սարքերի մեծ մասը Իսրայելի տարածքից դուրս: Ընդ որում, հրթիռների որոշ մասն, այնուամենայնիվ, ընկել է երկրի տարածքում, սակայն դրանք աննշան վնաս են հասցրել։