Ուկրաինայի զինված ուժերի գլխավոր հրամանատար Ալեքսանդր Սիրսկին հայտարարում է, որ Ռուսաստանի բարձրագույն ռազմական ղեկավարությունը խնդիր է դրել իր զինվորների առաջ մինչև մայիսի 9-ը Դոնեցկի մարզում գրավել Չասով Յարը:

Այս մասին Սիրսկին հայտնել է ապրիլի 14-ին սոցցանցերում հրապարակված գրառման մեջ։ Տեղեկատությունը փոխանցում է nv.ua-ն:

Նա նշում է, որ թշնամու ծրագրերին խանգարում է ուկրաինացի պաշտպանների հերոսական պաշտպանությունը, որոնք զսպում են թշնամու ամենօրյա հարձակումները։ Միևնույն ժամանակ նա նշում է, որ սպառնալիքը մնում է արդիական։

Նա նշել է, որ շարունակվում են մարտական ստորաբաժանումների ապահովման համար կառավարման արդյունավետության բարձրացման և ռեսուրսների ազատման միջոցառումները:

«Այդ միջոցառումների գլխավոր խնդիրը մեր զորքերի մարտունակության մեծացումն է, մեր զինվորների կյանքի պահպանումը, թշնամու պլանների խափանումը, պահեստազորայինների պատրաստության ապահովումը։ Պայքարը շարունակվում է», - գրել է Սիրսկին։