Զախարովան մեկնաբանել է «Զվարթնոց» օդանավակայանում սահմանապահների հետ կապված իրավիճակը
Ռուսաստանը Հայաստանից դիվանագիտական ուղիներով «Զվարթնոց» օդանավակայանից ռուս սահմանապահների դուրսբերման մասին ծանուցումներ չի ստացել, այդ հարցով որոշումը կընդունվի միջգերատեսչական ուսումնասիրության արդյունքում։ Այս մասին ճեպազրույցի ժամանակ հայտնել Է ՌԴ ԱԳՆ պաշտոնական ներկայացուցիչ Մարիա Զախարովան:
«Մենք իսկապես տեսել ենք հայկական ղեկավարության մեկնաբանությունները տվյալ թեմայի վերաբերյալ։ Ինչպես հասկանում ենք, համապատասխան ծանուցումն ուղարկվել է գերատեսչական գծով, դիվանագիտական ուղիներով մենք ոչինչ չենք ստացել»,- ասել է նա՝ պատասխանելով ՌԻԱ Նովոստիի հարցին։
«Մենք ելնում ենք նրանից, որ բոլոր որոշումները կկայացվեն միջգերատեսչական մշակման արդյունքում, եւ նախնական առումով կցանկանայինք նշել, որ հիշյալ հայտարարությունը հայկական կողմից արվել է պաշտոնական Երեւանի ոչ բարեկամական քայլերի եւ հայտարարությունների մի ամբողջ շարքի ֆոնին», - հավելել է նա՝ նշելով, որ «դժվար թե նման նախաձեռնությունը համապատասխանի Հայաստանի և նրա քաղաքացիների անվտանգության շահերին»:
