ԼՈՒՍԱՆԿԱՐՆԵՐ․ Երևանում հրկիզել են քրեական աշխարհում հայտնի անձի «Cadillac»-ը
Երեկ՝ մարտի 12-ին, ավտոմեքենայի հրկիզման դեպք է տեղի ունեցել Երևանում։ Այս մասին հաղորդում է Shamshyan.com-ը։
Ժամը 02։50-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Նիկողայոս Տիգրանյան փողոցում ավտոմեքենաներ են այրվում։
Կայքը հայտնում է, որ հրդեհը բռնկվել է կայանված վիճակում գտնվող «Cadillac Escalade» մակնիշի ավտոմեքենայում, կրակը տարածվել ու վնասել է հարևանությամբ կայանված «Toyota Prius» մակնիշի ավտոմեքենան։
Կայքի տեղեկություններով՝ «Cadillac Escalade»-ը պատկանում է Երևանի բնակիչ 35-ամյա Արման Ա․-ին, ով քրեական աշխարհում հայտնի է «Թլոշ» Արման մականվամբ և իրավապահները կասկածներ ունեն, որ նրա ավտոմեքենան հրկիզել են։
