Երևանը Մոսկվային տեղեկացրել է Զվարթնոցում ՌԴ սահմանապահների աշխատանքը դադարեցնելու մասին. Պեսկով

ՌԴ-ն Հայաստանից ծանուցում է ստացել «Զվարթնոց» օդանավակայանում ռուս սահմանապահների աշխատանքը դադարեցնելու մասին, Երևանի հետ շփումները շարունակվում են: Այս մասին լրագրողների հետ զրույցում ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով ՏԱՍՍ-ի հարցին:

«Իսկապես, գերատեսչական նամակ է ստացվել այդ կապակցությամբ, և գերատեսչությունների գծով այժմ շփումներ են իրականացվում։ Ավելին ես հիմա չեմ կարող ասել», - ասել Է Պեսկովը՝ մեկնաբանելով Հայաստանի վարչապետ Նիկոլ Փաշինյանի հայտարարությունը Երևանի օդանավակայանում ռուս սահմանապահների մասին։

Կրեմլի ներկայացուցիչը հավելել է. «Բնականաբար, բոլոր հնարավոր մակարդակներում շփումները կշարունակվեն»:

Երեքշաբթի օրը Փաշինյանը հայտարարեց, որ սահմանապահները ռուս գործընկերներին տեղեկացրել են, որ հայկական կողմը կարող է ծառայություն իրականացնել «Զվարթնոց» օդանավակայանում՝ առանց իրենց աջակցության: Ավելի վաղ Անվտանգության խորհրդի քարտուղար Արմեն Գրիգորյանը ևս հայտարարել էր, որ Երևանը պաշտոնական նամակ է հղել Մոսկվային՝ Զվարթնոցում ռուս սահմանապահների գործունեությունը դադարեցնելու համար: