ՏԵՍԱՆՅՈՒԹ. Մեքսիկայում նախագահի թեկնածուն արյամբ կնքել է երդումը

«Ուժ և սիրտ հանուն Մեքսիկայի» աջ կենտրոնամետ դաշինքից Մեքսիկայի նախագահի թեկնածու Գալվեսն արյունով է կնքել կենսաթոշակային տարիքը 65-ից 60-ի նվազեցնելու, ինչպես նաև սոցիալական ծրագրերը չկրճատելու իր խոստումը: Այս մասին քաղաքական գործիչը հայտնել է նախընտրական հանրահավաքի ժամանակ, որի տեսանյութը տեղադրել է X-ի էջում:

«Ես, երբ ստանձնեմ նախագահի պաշտոնը, չեմ չեղարկի սոցիալական ծրագրերը, որոնք մեքսիկացիների իրավունքն են: Ես կավելացնեմ, որ կենսաթոշակի անցնելու տարիքը կկազմի 60 տարի», - հայտարարել է թեկնածուն, որից հետո նոտարի ներկայությամբ ստորագրել է փաստաթուղթ՝ իր խոստումներով: Ստորագրության վերևում Գալվեսը ձախ ձեռքի ցուցամատի արյունոտ մատնահետք է տեղադրել։ «Խոստումներն ամրացված են իմ արյունով, դա ամենաթանկ բանն է, որ ես ունեմ։ Սոցիալական ծրագրերը չեն կրճատվի», - հայտարարել է կինը ՝ հավաքված կողմնակիցներին ցույց տալով իր ստորագրած փաստաթղթի թերթիկը։

Մեքսիկայում նախագահական ընտրություները տեղի կունենան հունիսի 2-ին: Իշխող ձախ կենտրոնամետ Ազգային վերածննդի շարժման թեկնածուն Կլաուդիա Շեյնբաումն է, որը 2018-2023 թվականներին գլխավորել է Մեխիկո քաղաքի կառավարությունը: Դրա հիմնական ընդդիմախոսը սենատոր Սոչիտլ Գալվեսն է, որը ներկայացնում է «Ուժ եւ սիրտ հանուն Մեքսիկայի» ընդդիմադիր աջ կենտրոնամետ դաշինքը։ Գործող նախագահ Անդրես Մանուել Լոպես Օբրադորը չի առաջադրվի, քանի որ Սահմանադրությամբ կրկնակի վերընտրություն նախատեսված չէ: