ՏԵՍԱՆՅՈՒԹ. Բնակելի շենքի մոտ անօդաչու թռչող սարք է ընկել ու պայթել. Սանկտ Պետերբուրգ

Սանկտ Պետերբուրգում բնակելի շենքի մոտ անօդաչու թռչող սարք է ընկել ու պայթել։

Սանկտ Պետերբուրգի նահանգապետը հայտնել է Կրասնոգվարդեյսկի շրջանում տեղի ունեցած միջադեպի մասին, սակայն չի հստակեցրել, թե կոնկրետ ինչ է տեղի ունեցել: «Տուժածներ չկան։ Մասամբ վնասվել է երկու տների պատշգամբների ապակեպատումը։ Տուժած բնակարանների բնակիչները տարհանվել են»,-գրել է նա Telegram-ի իր ալիքում։

Հաղորդվում է, որ տեղում աշխատում են արտակարգ իրավիճակների նախարարության և իրավապահ մարմինների աշխատակիցները։ Ձևավորվել է օպերատիվ շտաբ, որը գլխավորում է Սանկտ Պետերբուրգի նահանգապետ Ալեքսանդր Բեգլովը։

Ռուսական այլ լրատվամիջոցների հաղորդմամբ՝ անօդաչու թռչող սարքն ընկել է Պիսկարևսկի պողոտայում գտնվող բնակելի շենքի մոտ։ Պայթյունի հետևանքով կոտրվել են բնակարանների ապակիները։ Դեպքի վայրում են շտապօգնության ծառայությունները։ Միջադեպի մասին պաշտոնական տեղեկություն դեռ չկա։