Ադրբեջանի ձեռք բերած սպառազինությունը տարածաշրջանը կայունացնելու համար չէ․ Գրիգորյան

Ադրբեջանի ձեռք բերած սպառազինությունը տարածաշրջանը կայունացնելու համար չէ։ Այս մասին ասել է ՀՀ Անվտանգության խորհրդի քարտուղար Արմեն Գրիգորյանը: 

Ըստ նրա, այս հարցը բազմիցս քննարկվել է։

«Մենք նաև առաջարկել ենք, որպեսզի սպառազինության վերահսկման մեխանիզմներ էլ ունենանք, որովհետև սպառազինության վերահսկումը կարող է տարածաշրջանում կայունության և երկարատև խաղաղության հաստատման գործընթաց լինել»,- ասել է նա։

Արմեն Գրիգորյանը հայտարարել է նաև, որ Հայաստանի և Ադրբեջանի ղեկավարների նոր հանդիպում է պլանավորվում։

«Մյունխենում վարչապետ Փաշինյանի և նախագահ Ալիևի հանդիպումից հետո պայմանավորվածություն է ձեռք բերվել, որ ԱԳ նախարարներն ու փոխվարչապետերը հանդիպեն։ Հիմա քննարկվում է»,- ասել է նա։