Ադրբեջանի ԱԳՆ-ն՝ ռուս խաղաղապահների տեղակայման ժամկետի մասին
Ռուսաստանի Դաշնության խաղաղապահ զորակազմի՝ Ադրբեջանում (օկուպացված Արցախի տարածքում խմբ․) գտնվելու ժամկետն ավարտվում է 2025 թվականին։ Այս մասին ասել է Ադրբեջանի ԱԳՆ մամուլի ծառայության ղեկավար Այխան Հաջիզադեն։
Նրա պնդմամբ՝ անցած տարվա սեպտեմբերին Ադրբեջանի իրականացրած հակաահաբեկչական միջոցառումներից հետո խաղաղապահ զորախմբի ամենօրյա գործունեության վերաբերյալ պարբերաբար հանդիպումներ և քննարկումներ կազմակերպելու անհրաժեշտություն է առաջացել։
«Միևնույն ժամանակ, հաշվի առնելով, որ Հայաստանի Զինված ուժերը վերջին 3 տարվա ընթացքում զանգվածաբար ականապատել են Ադրբեջանի տարածքները, որտեղ խաղաղապահներ են տեղակայված, ինչպես նաև՝ հաշվի առնելով տարածքում չպայթած զինամթերքի խնդիրը, անհրաժեշտություն է առաջացել խորհրդակցություններ անցկացնել այդ սպառնալիքների վերացմանն ուղղված ջանքերի շուրջ», - ասել է Հաջիզադեն:
