Վլադիմիր Զելենսկին երկրի զինված ուժերում նոր նշանակումներ է արել

Ուկրաինայի նախագահ Վլադիմիր Զելենսկին նշանակել է Ուկրաինայի զինված ուժերի գլխավոր հրամանատարի տեղակալներ և Ուկրաինայի զինված ուժերի գլխավոր շտաբի պետի տեղակալներ։ Այս մասին տեղեկանում ենք ուկրաինական ԶԼՄ–ներից:

Գերագույն գլխավոր հրամանատար Ալեքսանդր Սիրսկինի տեղակալներ են դարձել գնդապետ Վադիմ Սուխարևսկին և գնդապետ Անդրեյ Լեբեդենկոն։

Բացի այդ, երկրի ղեկավարը համաձայնեցրել է բրիգադային գեներալներ Վլադիմիր Գորբատյուկի, Ալեքսեյ Շևչենկոյի և Միխայիլ Դրապատիի թեկնածությունները Ուկրաինայի զինված ուժերի գլխավոր շտաբի պետի տեղակալի պաշտոններում։

Ավելի վաղ Ուկրաինայի Զինված ուժերի նախկին գլխավոր հրամանատար Վալերի Զալուժնին հրաժարականից հետո առաջին հրապարակային հայտարարությունն էր արել։ Իր թելեգրամյան ալիքում նա Ուկրաինայի հերոսի կոչում ստանալն անվանել էր «պատիվ և պատասխանատվություն»:

«....Ես ծառայում եմ և ծառայելու եմ ուկրաինացի ժողովրդին նվիրվածությամբ և երախտագիտությամբ», - գրել էր նա։

Զալուժնիի հրաժարականի մասին, ով ղեկավարում էր Ուկրաինայի զինված ուժերը 2021 թվականից, հայտարարվել էր փետրվարի 8-ին։ Ուկրաինայի նախագահ Վլադիմիր Զելենսկին շնորհակալություն է հայտնել նրան «երկու տարվա պաշտպանության համար» և «յուրաքանչյուր հաղթանակի համար, որը մենք ձեռք ենք բերել միասին»։ Գերագույն գլխավոր հրամանատարի պաշտոնը ստանձնել է Ուկրաինայի զինված ուժերի ցամաքային զորքերի հրամանատար Ալեքսանդր Սիրսկին։ Զելենսկու խոսքով՝ նա «պաշտպանության հաջող փորձ» ունի՝ նա անցկացրել է «Կիևի պաշտպանական օպերացիան», և «հարձակման հաջող փորձ»՝ նա ղեկավարել է մարտերը Խարկովի շրջանում 2022 թվականի աշնանը։