Ֆերմերները փակել են Նիդեռլանդների և Բելգիայի սահմանային մայրուղին

Հոլանդացի և բելգիացի ֆերմերները տրակտորներով փակել են մայրուղին Բելգիայի հետ սահմանին գտնվող հոլանդական Լիմբուրգ նահանգի Էյսդեն անցակետում:

Այդ մասին տեղեկացնում է «ՌԻԱ Նովոստի»-ն։

Նշվում է, որ ավելի քան 100 տրակտորներ, ինչպես նաև գյուղատնտեսական մեքենաներ մասնակցում են Հոլանդիայից և Բելգիայից եկած ֆերմերների համատեղ կազմակերպած ինքնաբուխ բողոքի ակցիային։

Որպես կանխարգելիչ միջոց՝ Էյսդեն սահմանային անցակետի մոտակայքում գտնվող ավտոճանապարհը փակվել է ինչպես հյուսիսային, այնպես էլ հարավային ուղղություններով:

Այդ կերպ ֆերմերները ցանկանում են ուշադրություն հրավիրել ավելի ու ավելի խիստ միջոցների և կանոնակարգերի վրա, որոնք իրենց նկատմամբ կիրառվում են ԵՄ-ի և ազգային կառավարությունների կողմից:

Վերջին օրերին ԵՄ երկրներում աճում են ֆերմերների բողոքի ցույցերը՝ պահանջելով փոխել համաեվրոպական գյուղատնտեսական քաղաքականությունը, վերացնել դրանց բազմաթիվ սահմանափակումները, այդ թվում՝ բնապահպանական, և դադարեցնել էժան ապրանքների անվերահսկելի ներմուծումը։

Արհմիությունների տարբեր ասոցիացիաներ պնդում են, որ ԵՄ-ում ֆերմերների աշխատանքը գործնականում դադարել է շահութաբեր լինել Եվրոպական հանձնաժողովի և կառույցի անդամ երկրների քաղաքականության պատճառով։