Համապատասխան ազդակները վաղուց ուղարկվել են Հայաստանի մայրաքաղաք. Լավրով

Արևմուտքի երկրները չեն ցանկանում իրականացնել Հայաստանի և Ադրբեջանի միջև խաղաղ կարգավորման վերաբերյալ պայմանավորվածությունները, որոնք կնքվել են Ռուսաստանի միջնորդությամբ, Արևմուտքը խանգարում է հակամարտության կարգավորման գործընթացին։ Այս մասին  հայտարարել է ՌԴ ԱԳ նախարար Սերգեյ Լավրովը: Տեղեկությունը փոխանցում է ՌԻԱ Նովոստին։

«Մենք տեսանք, թե ինչպես ԵՄ-ն, Ֆրանսիան, Գերմանիան, ԱՄՆ-ը, հենց որ հասկացան, որ ռուս-հայ-ադրբեջանական գործընթացն արդյունք է տալիս երթուղիների ապաշրջափակման, սահմանի սահմանազատման և խաղաղության պայմանագրի պատրաստման հարցում, անմիջապես սկսեցին առանց հրավերի ներթափանցել գործընթացի մեջ, և նրանք խաղացել են փչացնողի դեր»,- ամփոփիչ ասուլիսում նշեց նախարարը։

Լավրովը հավելել է, որ Արևմուտքը չի ցանկանում թույլ տալ, որ կայանան այն պայմանավորվածությունները, որոնք «Ռուսաստանի միջնորդությամբ կնքվել են Երևանի և Բաքվի միջև»:

«Ցավալի է, որ արևմտյան եսասիրական նկրտումների շահերը, դրանք խանգարում են և Հայաստանի, և Ադրբեջանի արմատական շահերի իրագործմանը», - եզրափակել Է ՌԴ ԱԳ նախարարը:

ՌԴ ԱԳ նախարար Սերգեյ Լավրովը նաև նշել է, որ Բաքուն պատրաստ է պայմանագիր կնքել Երևանի հետ Ռուսաստանի տարածքում։ 

«Այն, որ արևմտյան գործընկերները ցանկանում են, որպեսզի միայն իրենց տարածքում հայ-ադրբեջանական խաղաղության պայմանագիր ստորագրվի, դա փաստ է։ Այն, որ Ադրբեջանը պատրաստ է այն ստորագրել ռուսական տարածքում, որտեղ, ըստ էության, սկսվել են հակամարտությանը վերջ տալու և բոլոր հարցերի կարգավորման համար փոխգործակցության ամբողջ համակարգի կառուցման ջանքերը, նույնպես փաստ է։ Թե որքանով է դրան պատրաստ Երևանը, ինձ հայտնի չէ, թեև համապատասխան ազդակները վաղուց ուղարկվել են Հայաստանի մայրաքաղաք»,-հայտարարել Է Լավրովը։