ԱՄՆ-ն Ադրբեջանը ներառել է հատուկ հսկողության տակ գտնվող երկրների ցանկում Արցախի գրավումից հետո կրոնական խնդիրների պատճառով

ԱՄՆ-ն Ադրբեջանին ներառել է հատուկ հսկողության տակ գտնվող երկրների ցանկում՝ կրոնական ազատության հետ կապված խնդիրների պատճառով։ Դրա համար հիմք է դարձել Բաքվի մասնակցությունը կամ հանդուրժողականությունը կրոնի ազատության հարցում թույլ տրված լուրջ խախտումներին՝ Լեռնային Ղարաբաղի նկատմամբ վերահսկողություն հաստատելուց հետո, հայտնում է France 24-ը։

«ԱՄՆ պետքարտուղար Էնթոնի Բլինքենը երեկ ասել է, որ բացի Ադրբեջանից, այս ցուցակում ընդգրկվել են նաև Կենտրոնաֆրիկյան Հանրապետությունը, Կոմորը և Վիետնամը»,- նշում է ֆրանսիական գործակալությունը։

Վաշինգտոնի այս պաշտոնական որոշումը հետևեց այն մտահոգություններին, որոնք արտահայտվել էին ԱՄՆ Միջազգային կրոնական ազատությունների հանձնաժողովի կողմից՝ կապված Լեռնային Ղարաբաղում քրիստոնեական սրբավայրերի պահպանման հետ:

Հանձնաժողովը նաև մտահոգություն է հայտնել Ադրբեջանի նախագահ Իլհամ Ալիևի գլխավորած մահմեդական մեծամասնություն ունեցող երկրում կրոնական գործունեության կանոնների վերաբերյալ: Խոսքը, մասնավորապես, կրոնական կազմակերպությունների գրանցման, ինչպես նաև դրանց գրականության պաշտոնական հաստատման պահանջի մասին է։