Ցանկացած ահաբեկչական գործողություն Հայաստանի համար անընդունելի է․ Վահան Կոստանյան
Հայաստանի Հանրապետության իշխանությունը՝ թե՛ նախագահը, թե՛ վարչապետը և թե՛ արտաքին գործերի նախարարը, իրենց գործընկերներին փոխանցել են ցավակցական հեռագրեր Քերմանում տեղի ունեցած ահաբեկչության հետ կապված։ Այս մասին ասել է ՀՀ ԱԳ փոխնախարար Վահան Կոստանյանը։
«Եվ ևս մեկ անգամ ուզում եմ վերահաստատել, որ ցանկացած ահաբեկչական գործողություն, որի հետևանքով անմեղ մարդիկ են զոհվում և վիրավորվում, անընդունելի է Հայաստանի Հանրապետության համար։ Նման դեպքերը ցույց են տալիս, որ ահաբեկչության դեմ պայքարը որևէ վայրկյան չպետք է դադարի, և պետությունները պետք է շարունակեն միասնական ճակատով պայքարել դրա դեմ, որովհետև դա համամարդկային չարիք է»,– ասել է նա:
Հայաստանում Իրանի դեսպանությունը ավելի վաղ հայտնել էր, որ Իրանում ավելի քան 100 մարդու կյանք խլած ահաբեկչության կապակցությամբ երկրի դեսպանատանը հունվարի 5-ին սգո մատյան է բացվելու։
Ահաբեկչությունը տեղի է ունեցել հունվարի 3-ին Քերման քաղաքի գերեզմանատան մոտ՝ Իրանի իսլամական հեղափոխության պահապանների կորպուսի հատուկ նշանակության ուժերի հրամանատար Ղասեմ Սոլեյմանիի սպանության չորրորդ տարելիցին նվիրված միջոցառման ժամանակ:
