Որ դեպքում Թուրքիան կաջակցի ՆԱՏՕ-ին Շվեդիայի անդամակցությանը

Թուրքիան կաջակցի Շվեդիայի անդամակցությանը ՆԱՏՕ-ին, եթե ԱՄՆ-ն հաստատի Անկարային Ֆ-16 կործանիչներ վաճառելու գործարքը: Այս մասին հայտնում է թուրքական լրատվամիջոցը՝ վկայակոչելով իր աղբյուրները։ Տեղեկությունը փոխանցում է ՌԻԱ Նովոստին։

Թերթի տեղեկություններով՝ «լուրեր են շրջանառվում», որ այն բանից հետո, երբ օրակարգում է հայտնվել Ֆինլանդիայի և Շվեդիայի անդամակցության հարցը, կուլիսներում դրական արդյունքներ են գրանցվել այդ հարցի շուրջ:

Կառավարական շրջանակներին մոտ կանգնած թերթի սյունակագիր Աբդուլքադիր Սելվին հայտնել է, որ զենքի մատակարարման «գաղտնի էմբարգոն», որը որոշ երկրներ սահմանել էին Թուրքիայի դեմ, չեղարկվել է:

Ինչպես ընդգծում է թուրքական թերթը, Թուրքիայի համար խնդիր չէ Շվեդիայի հայտին հավանություն տալը, ամբողջ խնդիրը ԱՄՆ-ի կողմից վստահության բացակայությունն է: Եթե այդ վստահությունը հաստատվի, ապա Շվեդիայի ճանապարհը հարթվելու է։

Դեկտեմբերի 6-ին Թուրքիայի նախագահ Ռեջեփ Թայիփ Էրդողանը հայտարարել էր, որ ԱՄՆ-ից սպասում է Ֆ-16 կործանիչների մատակարարմանը՝ ՆԱՏՕ-ին Շվեդիայի հայտի վավերացման գործընթացն ավարտելու համար: