Ռոբերտ Քոչարյանին հիվանդանոցից տեղափոխել են «Երևան-Կենտրոն» ՔԿՀ

ՀՀ երկրորդ նախագահ Ռոբերտ Քոչարյանին «Գրիգոր Լուսավորիչ» բժշկական կենտրոնից տեղափոխել են «Երևան-Կենտրոն» քրեակատարողական հիմնարկ՝ դատարանի սահմանած երկամսյա կալանքը կրելու համար։

Քոչարյանի պաշտպան Արամ Օրբելյանը Sputnik Արմենիային հայտնել է, որ նախկին նախագահի առողջական վիճակը շարունակում է խնդրահարույց մնալ։

«Ես բժիշկ չեմ, բայց որքանով քննարկել եմ մասնագետների հետ և ուսումնասիրել մասնագիտական գրականությունը, իրավիճակը խնդրահարույց է։ Շուրջ երկու շաբաթ առաջ ստենտավորված պացիենտին, ելնելով նաև այն ախտանիշներից, որոնք ուներ պարոն Քոչարյանը, խորհուրդ է տրվում առնվազն ևս 2 շաբաթ գտնվել վերահսկողության տակ»,- ասել է Օրբելյանը։

Նրա խոսքով՝ պարտադիր չէ, որ Քոչարյանը գտնվի հենց հիվանդանոցում, սակայն անհրաժեշտ են այնպիսի պայմաններ, որ առողջական վիճակի սրման դեպքում հնարավոր լինի շատ արագ տեղափոխել բուժհաստատություն։

Հիշեցնենք՝ Հակակոռուպցիոն դատարանը՝ դատավոր Սարգիս Դադոյանի նախագահությամբ, ամբողջությամբ բավարարել է քննիչի միջնորդությունը և Ռոբերտ Քոչարյանի նկատմամբ որպես խափանման միջոց կիրառել երկամսյա կալանք։

Դատական նիստի մեկնարկից շուրջ 7 ժամ անց Քոչարյանը տեղափոխվել էր հիվանդանոց, իսկ նիստը շարունակվել էր առանց նրա։

Հակակոռուպցիոն կոմիտեի տվյալներով՝ Ռոբերտ Քոչարյանը մեղադրվում է առանձնապես խոշոր չափերով փողերի լվացման, պաշտոնեական լիազորությունների չարաշահման և առանձնապես խոշոր չափերով կաշառք ստանալու մեջ։