Մեզ ասել են` ինչի՞դ է պետք բանակը, մեջքներիդ կանգնած ենք, ի՞նչ խնդիր ունեք․ Փաշինյան
Արցախի Հանրապետությունը լուծարելու գործընթացն անխուսափելի էր դարձել 2016-ի օգոստոսին բանակցային գործընթացում տեղի ունեցած բովանդակային փոփոխությունների արդյունքում: Այս մասին Իջեւանում տեղի ունեցած ՔՊ նախաձեռնող խմբի նիստին ասելէ ՔՊ վարչության նախագահ, վարչապետ Նիկոլ Փաշինյանը:
«Բանակցային այն իրավիճակում, որ մենք ժառանգել ենք, առաջ գնալու անխուսափելի ճանապարհը ոչ միայն տարածքների հանձնումն էր և այլն, այլև Լեռնային Ղարաբաղում պետական հաստատված կարգի լուծարումը և զրոյացումը: Ես սրա մասին առաջին անգամ շատ զգույշ խոսել եմ քննիչ հանձնաժողովում իմ ելույթի ժամանակ, երկրորդ անգամ ավելի բաց խոսել եմ վերջերս քաղաքացիների հարցերին պատասխանելու ժամանակ: Եւ կարող եմ ավելի ազատ խոսել հիմա, ցավոք, ԼՂ-ում տեղի ունեցած իրադարձություններից հետո»,- ասել է Փաշինյանը:
Փաշինյանը նշում է, որ այս թեմայով չի խոսվել, քանի որ եթե խոսեին, պետք է ժողովրդին ասեին, որ 30 տարի շարունակ անիմաստ են ռեսուրսները վատնվել մի խնդրի վրա, որն ի սկզբանե անլուծելի էր:
«Ինչո՞ւ էր ի սկզբանե անլուծելի, մի քանի պատճառներով՝ ՄԱԿ-ի անվտանգության խորհրդի բանաձեւերի պատճառով: Մեզ հիմա շատ են մեղադրում՝ ասելով, որ ի սկզբանե ասեցիք, որ հետամուտ կլինեք ԼՂ ինքնորոշման խնդրին, բայց հետամուտ չեղաք: Ամբողջ խնդիրն այն է, որ մենք փորձեցինք հասկանանք՝ ինչ է ինքնորոշման իրավունքը եւ 1996 թվականի դեկտեմբերի 6-ին Լիսաբոնի գագաթնաժողովում մեզ ասել էին, որ ինքնորոշման իրավունքի բարձրագույն դրսեւորումը կարող է լինել ինքնավար կարգավիճակը Ադրբեջանի կազմում: Ըստ էության, մենք գնացել ենք այս տրամաբանության հետեւից եւ նաեւ մեր մեղավորությունն ու մեծագույն սխալն այն է, որ մենք այս թեմաներով մեր ժողովրդի հետ սկսել ենք խոսել 44-օրյա պատերազմից հետո: Մյուս կողմից այդ խոսակցության հոգեբանական եւ էմոցիոնալ անհնարինության առաջ ենք կանգնած եղել, ես ինքս ինձ հետ չեմ կարրողացել այդ մասին խոսել, ինչում ես մեղավոր եմ»,-ասաց նա:
Փաշինյանի խոսքով՝ Արցախի հարցը որոշ ուժեր օգտագործել են ՀՀ-ում պետություն չկառուցելու համար, ամեն ինչ ուղղելով Արցախի անհնարին խնդիրը լուծելու համար:
«Այսինքն, մենք մեր ամբողջ ռեսուրսը, որ պետք է դնեինք պետություն ստեղծելու վրա, ՀՀ ստեղծելու վրա, դրել ենք ԼՂ պետություն ստեղծելու անլուծելի խնդրի վրա»,– նշել է ՀՀ վարչապետը։
Փաշինյանը հայտարարել է, որ պետք է իմանանք` ի՞նչ է տեղի ունեցել մեզ հետ, որպեսզի հասկանանք` ինչ է տեղի ունենում հիմա, և որպեսզի պլանավորենք, թե ինչ է տեղի ունենալու վաղը։
«Տարիներ շարունակ մեզ ասել են` ճանապարհներ, դպրոցներ, հիվանդանոցներ մի կառուցիր, նույնիսկ` ինչի՞դ է պետք բանակը, մեջքներիդ կանգնած ենք, դուք ի՞նչ խնդիր ունեք։ Արդյունքում մեր ռեսուրսը ծախսել ենք անլուծելի խնդրի վրա»,– ընդգծել է նա։
Փաշինյանի խոսքով` այսօրվա մեր առաքելությունը Հայաստանի անկախությունն է, ինքնիշխանությունը, պետականությունը, ժողովրդավարության ամրացումն է կամ Հայաստանի Հանրապետության վերահաստատելը որպես ինքնիշխան, անկախ, ժողովրդավար և ազատ իրավական պետություն։
