«Բոլոր միգրանտները պետք է հարգեն ռուսական օրենքներն ու ավանդույթները». Պուտին

Աշխատանքային միգրանտները պետք է համապատասխանեն Ռուսաստանի տնտեսության շահերին, հարգեն Ռուսաստանի Դաշնության մշակույթն, ավանդույթներն ու օրենքները, բայց պետք է հարգվեն նաև նրանց իրավունքները, ասել է նախագահ Վլադիմիր Պուտինը։

«Մենք պետք է ներգրավենք այնպիսի աշխատանքային ռեսուրսներ, որոնք կբավարարեն առաջին հերթին Ռուսաստանի տնտեսության շահերը, սա նշանակում է, որ այդ մարդիկ պետք է պատրաստ լինեն լեզվական, էթնոմշակութային տեսանկյունից, նրանք պետք է իմանան մեր ավանդույթները, օրենքները», - ասել է Պուտինը Քաղաքացիական հասարակության և մարդու իրավունքների զարգացման խորհրդի նիստում:

Նա նշել է, որ միգրանտների իրավունքների հարցը «շատ սուր է»։

«Այստեղ ես չեմ կարող չհամաձայնել, որ պետք է պահպանել էթնոմշակութային հավասարակշռությունը, իհարկե, այն ամենը, ինչ տեղի է ունենում այս ոլորտում, առաջին հերթին թելադրված է տնտեսության շահերով, աշխատողների պակասով, բայց, իհարկե, այս մարդկանց անհրաժեշտ է վերապատրաստվել»,- ասել է նախագահը։

Միաժամանակ նա ընդգծել է, որ առաջին հերթին անհրաժեշտ է առաջնային պլան մղել Ռուսաստանի Դաշնության քաղաքացիների շահերը բոլոր ոլորտներում։