Հայաստանում ապրող քանի հնդիկ կա․ Քերոբյանը թիվ է հրապարակել
Աշխատանքային միգրանտների թիվը չի հաշվվում զբոսաշրջիկների ցուցանիշների մեջ։ Այս մասին ասել է Էկոնոմիկայի նախարար Վահան Քերոբյանը՝ անդրադառնալով Հայաստան եկող Հնդկաստանի մեծթիվ քաղաքացիների թեմային։
«Տարբեր թվեր են հնչում․ առկա թվերը, որ վերցրել ենք սահմանահատումներից, խոսում է այն մասին, որ ավելի քիչ են, քան 30 հազարը։ 60 հազար թիվը իրականությանը չի համապատասխանում։ 20-30 հազարի միջակայքում է»,- ասել է նախարարը՝ հավելելով, որ Հնդկաստանից զբոսաշրջիկների հոսքը մեծ չէ, հետևաբար, նրանք զբոսաշրջիկ չեն համարվում։
«Չեմ կարող ասել, որ բարձր որակավորում ունեցող մասնագետներ են գալիս Հնդկաստանից։ Բարձր որակավորում ունեցող մասնագետներ գալիս են Ռուսաստանից, Ուկրաինայից, Բելառուսից»,- ասել է նախարարը։
Նշենք, որ Քերոբյանը նաև տեղեկացրել է, որ այս տարվա 10 ամսում Հայաստան է այցելել 2 մլն զբոսաշրջիկ, ինչը 2019թ․ համեմատ 25%–ով ավել է։ Քերոբյանի խոսքով՝ մինչև տարեվերջ ակնկալվում է 2,4 մլն զբոսաշրջիկի այց։ Ամեն զբոսաշրջիկ միջինը ծախսում է 1200 դոլար, որից բյուջե է գնում մոտ 110 դոլարը։
