Թուրքիան մտադիր է նոր կործանիչներ գնել՝ անկախ Գերմանիայի դիրքորոշումից
Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան իրեն կապահովի կործանիչներով՝ չնայած Գերմանիայի դիրքորոշմանը Անկարային Eurofighter տրամադրելու վերաբերյալ։
Թուրքիան մտադիր է գնել 40 Eurofighter կործանիչ, ստացել է Մեծ Բրիտանիայի և Իսպանիայի համաձայնությունը և փորձում է համոզել Գերմանիային, ավելի վաղ հայտարարել էր երկրի ազգային պաշտպանության նախարար Յաշար Գյուլերը։
«Արդյո՞ք Գերմանիան միակ երկիրն է աշխարհում, որ կործանիչներ է արտադրում։ Շատ երկրներ են աշխատում դրա վրա: Ներկայումս Թուրքիան անօդաչու թռչող սարքերի առաջատար երկրներից է:
Որպես լրատվամիջոցի ներկայացուցիչ՝ կարիք չկա մեզ դրանով սպառնալ, բարեխիղճ հարցեր տվեք մեզ, և մենք ձեզ պատասխաններ կտանք այս ուղղությամբ»,- ասել է Էրդողանը Բեռլինում Գերմանիայի կանցլեր Օլաֆ Շոլցի հետ համատեղ ասուլիսում։
Այսպես նա պատասխանել է լրագրողին, ով հարցրել է Թուրքիայի ղեկավարին, թե ինչ կլինի, եթե Գերմանիան հրաժարվի Թուրքիային կործանիչներ վաճառել։
