Մախաչկալայի օդանավակայանը վերսկսել է աշխատանքը․ ինչ որոշում կա Թել Ավիվից չվերթների վերաբերյալ

Մախաչկալայի օդանավակայանը վերսկսել է չվերթների ընդունումն ու ուղարկումը: Այս մասին հայտնում է Ռոսավիացիան։ Տեղեկությունը փոխանցում է Ведомости-ն։ 

«Ընդ որում, «Ազիմուտ» եւ Red Wings ավիաընկերությունների չվերթները Թել Ավիվից Միներալնիե Վոդի եւ Մախաչկալա ժամանակավորապես կուղեւորվեն Ռուսաստանի այլ քաղաքներ»,- մանրամասնել են գերատեսչությունում:

Հիշեցնենք, որ օդանավակայանը փակվել էր հոկտեմբերի 29-ի երեկոյան, երբ Թել Ավիվից չվերթի վայրէջքից հետո այնտեղ էին ներխուժել հարյուրավոր մարդիկ, որոնք Իսրայելից փախստականներ էին փնտրում: Դաղստանցի մահմեդականները պահանջում էին, որ թույլ չտրվի Թել Ավիվ–Մախաչկալա չվերթով ժամանող հրեաների մուտքը երկիր: