ՏԵՍԱՆՅՈՒԹ․ «Ուժեղ Հայաստան»-ի պատգամավորների պարգևավճարներն ուղղվելու են բարեգործությանը․ Վարդևանյան

ԱԺ փոխնախագահի թեկնածու Արամ Վարդևանյանը պատասխանել է պատգամավորական աշխատավարձերի և պարգևավճարների վերաբերյալ հարցին՝ նշելով, որ «Ուժեղ Հայաստան» խմբակցությունն այդ հարցում հստակ դիրքորոշում ունի։

Վարդևանյանի խոսքով՝ խմբակցության ղեկավարն արդեն ներկայացրել է իրենց մոտեցումը աշխատավարձերի հարցով, իսկ պարգևավճարների մասով որոշումն առավել հստակ է։

«Պարգևավճարների հետ կապված ունենք հստակ դիրքորոշում։ Եթե նույնիսկ ձևական առումով որևէ պատգամավոր պարգևավճար ստանա, այն բացառապես ուղղվելու է բարեգործության՝ մեր հայրենակիցների խնդիրների լուծմանը»,- ասել է նա։

Նրա խոսքով՝ այդ գործընթացն իրականացվելու է առավելագույն թափանցիկությամբ։

«Թափանցիկության նոր շեմ ենք ուզում սահմանել, որպեսզի ցույց տանք, թե ինչպես են այդ միջոցներն օգտագործվում»,- նշել է Վարդևանյանը։

Ավելի վաղ նա նաև նշել էր, որ եթե «Ուժեղ Հայաստան» խմբակցությունը որոշի, ինքը պետք է վայր դնի պատգամավորական մանդատը, ապա դա կանի առանց որևէ վարանելու՝ ընդգծելով, որ խմբակցության որոշումները պետք է առաջնահերթ լինեն իր և խմբակցության մյուս պատգամավորների համար։