«Դիլիջան ազգային պարկ»–ում 2 օր է հրդեհ է
«Դիլիջան ազգային պարկ»–ում հրդեհաշիջման աշխատանքներն այսօր վաղ առավոտից վերսկսել են։ Տեղեկությունը հայտնում է ՀՀ շրջակա միջավայրի նախարարությունը։
Նոյեմբերի 6-ին` ժամը 13:30-ին, ճգնաժամային կառավարման կենտրոն ահազանգ է ստացվել, որ Հաղարծին վանական համալիրին հարակից անտառից ծուխ է նկատվում։ Դեպքի վայր են մեկնել փրկարարներ և պարզել, որ հրդեհը բռնկվել է «Դիլիջան ազգային պարկի» 3-րդ պահաբաժնում։ Ժամը 17։50-ին մոտ հրդեհը մեկուսացվել էր։
«Ժամը 20:07-ին մթության և բարդ ռելիեֆի պատճառով հրդեհաշիջման աշխատանքները դադարեցվել են․ «Դիլիջան ազգային պարկ» ՊՈԱԿ-ի աշխատակիցների կողմից սահմանվել է հերթապահություն»,– հայտնում են նախարարությունից։
Այսօր վաղ առավոտից հրդեհաշիջման աշխատանքները վերսկսվել են։ Ժամը 15։00–ի դրությամբ` քամու ուժգնության հետևանքով հրդեհը շարունակում է տարածվել «Դիլիջան ազգային պարկի» Հաղարծինի տեղամասում։
