Քարտեզները Թուրքիայի և Ադրբեջանի միջնակարգ դպրոցներում․ դրանցից մեկում Հայաստանը բացակայում է
Քանի որ Հայոց պատմության նոր դասագրքերի թեման շարունակում է ակտուալ մնալ, ցույց տամ, թե ինչ քարտեզներով են սովորում Թուրքիայի և Ադրբեջանի միջնակարգ դպրոցներում։ Այս մասին գրառում է կատարել թյուրքագետ Վարուժան Գեղամյանը։
«Առաջին նկարում Թուրքիայի 12-րդ դասարանի «Ժամանակակից թուրք և համաշխարհային պատմություն» դպրոցական դասագրքի (հրատարակված 2018 թ. և հաստատված Թուրքիայի ազգային կրթության նախարարության կողմից) գլխավոր քարտեզն է՝ «Թյուրքական աշխարհի քարտեզը» (Türk Dünyası haritası), որով թուրք աշակերտները պատկերացում են կազմում հարակից աշխարհի մասին։
Երկրորդ նկարում նույն քարտեզն է, որը Թուրքիայի խորհրդարանի իշխող կոալիցիայի երկրորդ ուժի՝ MHP կուսակցության առաջնորդ Բահչելին նվիրում է առաջին ուժի՝ AKP-ի ղեկավար, նախագահ Էրդողանին։
Երրորդ նկարում Ադրբեջանի պատմության դասագրքից «Թուրանի» քարտեզն է։ Թուրանը պանթյուրքիստական պետության ընդհանրական անունն է, որը նույնն է, թե «Թյուրքական աշխարհը»», - գրել է թյուրքագետը և հավելել․ «Ձեռքիս տակ ունեմ գրեթե բոլոր թուրքական դասագրքերը և այնտեղ ավելի հետաքրքիր դրվագներ կան, որոնք առաջիկայում կփորձեմ հրապարակել»
Auroranews-ը ճշտում անելու նպատակով կապ հաստատեց Վարուժան Գեղամյանի հետ, ով մեզ հետ զրույցում նշեց, որ առաջին նկարում պատկերված քարտեզում Հայաստանը ներառված է, իսկ երկրորդում բացակայում է։
Հարցին, թե արդյոք ներառված է Արցախը այս քարտեզներում թյուրքագետը պատասխանեց․ «բնականաբար ոչ, ոչ մեկում էլ չկա»։
