Իսրայելը քննադատել է Էրդողանի խոսքերը ՀԱՄԱՍ-ի վերաբերյալ
Իսրայելի իշխանությունները խստորեն դատապարտել են Թուրքիայի նախագահ Ռեջեփ Թայիփ Էրդողանի խոսքերն այն մասին, որ նա հրաժարվում էր ՀԱՄԱՍ–ն անվանել ահաբեկչական կազմակերպություն։
«Իսրայելը կտրականապես մերժում է նախագահ Էրդողանի կոշտ խոսքերը ՀԱՄԱՍ ահաբեկչական կազմակերպության մասին»,- գրել է Իսրայելի ԱԳՆ խոսնակ Լիոր Հայաթը X սոցիալական ցանցում։
Նա կրկին հիշեցրել է հոկտեմբերի սկզբին ՀԱՄԱՍ-ի զինյալների արյունալի հարձակումը Իսրայելի հարավում և նշել, որ խմբավորմանը «պաշտպանելու» Էրդողանի փորձերը չեն փոխի այն փաստը, որ «ՀԱՄԱՍ–ը համարժեք է ԻՊ-ին»:
Չորեքշաբթի ավելի վաղ Էրդողանը հայտարարել էր, որ ՀԱՄԱՍ–ը «ահաբեկչական կազմակերպություն չէ, այլ ազատարարների և մոջահեդների խումբ, որոնք պայքարում են իրենց հողերն ու հայրենակիցներին պաշտպանելու համար»:
Նա ասել է, որ Թուրքիան խնդիրներ չունի Իսրայելի հետ, սակայն դատապարտում է Իսրայելի հարձակումները Գազայի խաղաղ բնակիչների վրա։ Նախագահը հակամարտության բոլոր կողմերին կոչ է արել «մատը հանել ձգանից»։
Էրդողանը հայտարարել է նաև Իսրայել այցելելու ծրագրերի չեղարկման մասին։
