ԱՄՆ-ի հետ ջանքեր ենք գործադրելու՝ տարածաշրջանում խաղաղություն և կայունություն հաստատելու համար. Էրդողան

Թուրքիան և ԱՄՆ-ն շարունակելու են համագործակցել՝ տարածաշրջանում խաղաղություն և կայունություն հաստատելու ուղղությամբ։ Այս մասին հայտարարել է Թուրքիայի նախագահ Ռեջեփ Թայիփ Էրդողանը՝ կառավարության նիստից հետո ունեցած ելույթում։

Նա անդրադարձել է հուլիսի 7-8-ը Անկարայում կայացած ՆԱՏՕ-ի գագաթնաժողովին՝ նշելով, որ այն հնարավորություն է տվել ներկայացնել Թուրքիայի դիրքորոշումը միջազգային հարցերի, այդ թվում՝ ռուս-ուկրաինական պատերազմի վերաբերյալ։

«Պատերազմը պետք է լուծվի երկխոսության և դիվանագիտության միջոցով»,- ասել է Էրդողանը։

Թուրքիայի նախագահը խոսել է նաև ԱՄՆ նախագահ Դոնալդ Թրամփի հետ հանդիպման մասին՝ նշելով, որ այն կարևոր նշանակություն է ունեցել։

«Կշարունակենք գործակցել նախագահ Թրամփի հետ՝ ամրապնդելու թուրք-ամերիկյան հարաբերությունները։ Երկկողմ առևտուրը պետք է հասցնենք 100 միլիարդ դոլարի»,- հայտարարել է Էրդողանը։

Ավելի վաղ ՆԱՏՕ-ի գագաթնաժողովի ընթացքում Թրամփը հայտնել էր, որ հնարավոր է վերանայվեն Թուրքիայի նկատմամբ գործող ամերիկյան սահմանափակումները, ինչպես նաև քննարկվի Անկարային F-35 կործանիչների վաճառքի հարցը։

Միաժամանակ, Իսրայելի վարչապետ Բենիամին Նեթանյահուն Թրամփի հետ հեռախոսազրույցում մտահոգություն էր հայտնել Թուրքիայի քաղաքականության վերաբերյալ՝ նշելով, որ Անկարան, ըստ նրա, սպառնալիք է ներկայացնում Իսրայելի համար։