ՀԷՑ-ի շուրջ դատական պայքար․ դատարանը մերժեց «ՏԱՇԻՐ ԿԱՊԻՏԱԼ»-ի հայցը

ՀՀ վարչական դատարանը մերժել է «ՏԱՇԻՐ ԿԱՊԻՏԱԼ» ՓԲԸ-ի կողմից ՀՀ կառավարության դեմ ներկայացված հայցադիմումը։ Այս մասին հայտնում են Տարածքային կառավարման և ենթակառուցվածքների նախարարությունից։

Ընկերությունը հուլիսի 1-ին դիմել էր վարչական դատարան՝ պահանջելով ճանաչել, որ «Էներգետիկայի մասին» օրենքի հիման վրա՝ որպես բացառիկ միջոց, «Հայաստանի էլեկտրական ցանցեր» ՓԲԸ-ի 70 տոկոս բաժնեմասի օտարման իրավահարաբերություն գոյություն չունի։

Դատարանը, սակայն, գտել է, որ ներկայացված հայցը ենթակա չէ քննության, և առկա է հայցադիմումը ընդունելու մերժման հիմք։

ՏԿԵՆ-ի հաղորդմամբ՝ դատարանը որոշումը կայացրել է՝ հիմք ընդունելով Վարչական դատավարության օրենսգրքի 80-րդ հոդվածի 1-ին մասի 1-ին կետը, որի համաձայն՝ դատարանը մերժում է հայցադիմումի ընդունումը, եթե հայցը ենթակա չէ դատարանում քննության։