Իսրայելը մտադիր է ամբողջությամբ վնասազերծել ՀԱՄԱՍ-ին

Իսրայելը մտադիր չէ նվազեցնել Գազայի ուղղությամբ հարվածների ինտենսիվությունը պատանդների ազատման ֆոնին: Հայտնում է BBC-ի ռուսական ծառայությունը: 

Իսրայելցի զինվորականները հայտնել են, որ չեն պատրաստվում նվազեցնել Գազայի հատվածում ավիահարվածների ինտենսիվությունը՝ չնայած ևս երկու պատանդների ազատ արձակմանը: Գլխավոր շտաբի պետ Հերցի Հալևին հայտարարել է, որ չդադարող հարձակումները պետք է ամբողջությամբ վնասազերծեն ՀԱՄԱՍ-ին:

«Մենք պատերազմ ենք վարում։ Ես տեսել եմ, որ տեղերում ուժերը պատրաստ են և պատրաստված։ Մենք այստեղ ամեն երեկո քննարկում ենք բարդ հարցեր: Քաղաքական ղեկավարությունը և ՑԱԽԱԼ-ը առարկայական քննարկումներ են վարում։ Մեզ համար կարևոր է միայն Իսրայելի անվտանգությունը»,- հայտարարել է նա։

ՀԱՄԱՍ-ի կողմից վերահսկվող Գազայի առողջապահության նախարարության հայտարարությունների համաձայն՝ ավելի քան 5 հազար մարդ է սպանվել Իսրայելի ռազմական գործողության արդյունքում, որը սկսվել էր ի պատասխան հոկտեմբերի 7-ին պաղեստինցի զինյալների հարձակման: