«Անհապաղ լքել Եգիպտոսն ու Հորդանանը»․ Իսրայելը կոչ է արել իր քաղաքացիներին

Իսրայելի Ազգային անվտանգության խորհուրդը (ԱԱԽ) Եգիպտոսում և Հորդանանում իսրայելցիների համար նախազգուշացումը բարձրացրել է ամենաբարձր մակարդակի վրա, ինչը նշանակում է, որ այնտեղի քաղաքացիները պետք է անհապաղ լքեն այդ երկրները, ասվում է Իսրայելի վարչապետի գրասենյակում:

«ԱԱԽ-ն Եգիպտոսի և Հորդանանի համար նախազգուշացումը բարձրացնում է 4-րդ մակարդակի (բարձր սպառնալիք) և խորհուրդ է տալիս հրաժարվել այդ երկրներ մեկնելուց: Այս երկրներում գտնվողները պետք է հնարավորինս շուտ լքեն իրենց տարածքները», – ասվում է հայտարարության մեջ:

Դեպի Մարոկկո մեկնել ցանկացողների համար ևս նախազգուշացում է հայտարարվել (սպառնալիքի 3–րդ մակարդակ)։ Խորհուրդ է տրվում չայցելել երկիր, եթե չկա խիստ անհրաժեշտություն։

Իսրայելի ազգային անվտանգության խորհրդից նշել են, որ հակամարտության շարունակման ֆոնին վերջին օրերին աշխարհի տարբեր երկրներում, հատկապես Մերձավոր Արևելքում, արձանագրվել է հակաիսրայելական բողոքի ակցիաների հերթական սրացում՝ իսրայելական և հրեական խորհրդանիշների նկատմամբ թշնամանքի և բռնության դրսևորումներով:

Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։