Որքան է Արցախում տեղի ունեցած ողբերգական պայթյունի զոհերի նախնական թիվը․ ԶԼՄ

Արցախում տեղի ունեցած ողբերգական պայթյունի զոհ է դարձել 212 քաղաքացի։ Այս մասին MediaHub-ը զրուցել է Արցախի քննչական կոմիտեի ներկայացուցչի հետ։

Լրատվամիջոցի փոխանցմամբ, ըստ քննչական կոմիտեի ու Մարդու իրավունքների պաշտպանի գրասենյակի փաստահավաք առաքելության հավաքագրած տվյալների, պայթյունի զոհ է դարձել 212 քաղաքացի։ Հայաստանյան ու արտասահմանյան բուժհաստատություններ են տեղափոխվել հարյուրավոր քաղաքացիներ, նրանց մի մասի առողջական վիճակը գտնվում է ծայրահեղ ծանր վիճակում։ 

Մինչև հոկտեմբերի 4-ը Արցախի փրկարարների կողմից այդ տարածքում իրականացված որոնողափրկարարական աշխատանքների արդյունքում տարհանված դիերի մի մասը ճանաչելի են եղել, 150 անճանաչելի դիակ գտնվում է դատաբժշկական փորձաքննության բյուրոյում։ 

Տեղեկությունը, թե իբր ադրբեջանական կողմը պայթյունից հետո վիրավորներ է տեղափոխել Ակնա (Աղդամ) կամ Շուշի, իրականությանը չի համապատասխանում։  Ըստ ականատեսների՝ Ստեփանակերտ-Ասկերան ավտոճանապարհի ձախակողմյան հատվածում գտնվող, ՊՆ-ին պատկանող վառելիքի պահեստի տարածքում 500-ից ավելի մարդ է եղել, այդ թվում՝ կանայք ու երեխաներ։ Նախնական վարկածով պայթյունը և դրան հետևած հրդեհը անվտանգության կանոնների չպահպանման հետևանք է։

Հիշեցնենք՝ Արցախում սեպտեմնբերյան ռազմական գործողությունների, զոհերի դուրսբերման, վիրավոր զինծառայողների ու քաղաքացիական անձանց տարհանման, բռնի տեղահանության ֆոնին՝ սեպտեմբերի 25-ին վառելիքի պահեստում տեղի ունեցավ չարաբաստիկ պայթյուն։