Արցախից բռնի տեղահանված անձանցից շուրջ 2500–ը դուրս են եկել Հայաստանից

Լեռնային Ղարաբաղից բռնի տեղահանված անձանցից մոտավորապես 2500–ը դուրս են եկել Հայաստանի Հանրապետությունից (մեկնել են այլ երկիր. խմբ.)։ Կառավարության նիստի ժամանակ տեղեկությունը հայտնեց ՀՀ վարչապետ Նիկոլ Փաշինյանը։

«Մենք ուզում ենք, որ բոլորն առանց բացառության մնան, ապրեն, աշխատեն Հայաստանում: Ես ամեն օր ստանում եմ թվերը, թե Լեռնային Ղարաբաղից եկած ինչքան մարդ է դուրս եկել Հայաստանից, ես հույս ունեմ, որ նրանք այս շոկային վիճակը հաղթահարելու համար այցելում են արտերկրում գտնվող իրենց բարեկամներին, ինչ-որ ժամանակ կանցկացնեն այնտեղ ու կվերադառնան»,– ասաց վարչապետը:

Նա վստահեցրեց, որ եթե արցախահայերը իրենց տներ վերադառնալու հնարավորություն չունենան, ՀՀ կառավարությունը ամեն ինչ կանի, որ նրանք հենց Հայաստանում մնան։