ՌԴ ՊՆ-ից հայտնում են՝ ՀՀ-ի և Ադրբեջանի ռազմական պատվիրակությունները ժամանել են Տուլա. Պապիկյանը չի մասնակցում

ԱՊՀ երկրների, այդ թվում՝ Հայաստանի և Ադրբեջանի ռազմական պատվիրակությունները ժամանել են Տուլա՝ մասնակցելու ԱՊՀ երկրների պաշտպանության նախարարների խորհրդի նիստին. այս մասին, ինչպես գրում է ՌԻԱ «Նովոստի»-ն, հայտնել է ՌԴ ՊՆ-ն։

«Ութ երկրի պաշտպանության գերատեսչությունների պատվիրակությունների ղեկավարները ժամանել են Տուլա՝ մասնակցելու ԱՊՀ անդամ պետությունների պաշտպանության նախարարների խորհրդի նիստին»,- հայտնում է ՌԴ ՊՆ-ն։

Պաշտպանության նախարարները կքննարկեն ռազմական համագործակցության հարցերը և ՆԵՐԿԱՅԻՍ գլոբալ ռազմաքաղաքական իրավիճակը։ Ընդհանուր առմամբ հանդիպմանը կմասնակցի ութ պետություն՝ Ռուսաստանը, Հայաստանը, Ադրբեջանը, Բելառուսը, Ղազախստանը, Ղրղզստանը, Տաջիկստանը և Ուզբեկստանը։

Նշենք նաև, որ ՀՀ ՊՆ խոսնակ Արամ Թորոսյանն ի պատասխան լրատվամիջոցների հարցին, թե արդյոք ՀՀ պաշտպանության նախարար Սուրեն Պապիկյանը ևս մասնակցում է նիստին, ասել է. «Պաշտպանության նախարար Սուրեն Պապիկյանը Տուլա չի մեկնել և չի մասնակցում ԱՊՀ երկրների պաշտպանության նախարարների խորհրդի նիստին»։