ԿԲ նախագահի տեղակալի և խորհրդի անդամների՝ ՔՊ շտաբում գտնվելն իրենց անձնական նախաձեռնությունն է

Կենտրոնական բանկի նախագահի տեղակալի և խորհրդի անդամների՝ Երևանի ավագանու ընտրություններին «Քաղաքացիական պայմանագիր» կուսակցության շտաբում գտնվելու փաստն իրենց անձնական նախաձեռնությունն է, և որևէ առնչություն չունի իրենց աշխատանքային պարտականությունների կատարման հետ: Այս մասին Tert.am-ի գրավոր հարցմանն ի պատասխան հայտնել են ԿԲ-ից՝ միևնույն ժամանակ շեշտելով, որ այս հարցով չեն կարող բացատրություն տալ:

«Այդ հարցով կարող եք անձամբ դիմել Կենտրոնական բանկի նախագահի տեղակալին և խորհրդի անդամներին։ ԿԲ նախագահի տեղակալը և խորհրդի անդամները չեն նշանակվում ներքին ընթացակարգերով, և, հետևաբար, նրանք ԿԲ-ի աշխատակազմի անդամներ չեն:

Ելնելով այդ հանգամանքից՝ ԿԲ-ն չի կարող նաև որևէ գնահատական տալ նրանց գործողությունների մասով»,- պարզաբանել են ԿԲ-ից։

Հիշեցնենք՝  սեպտեմբերի 17-ին՝ Երևանի ավագանու ընտրությունների երեկոյան, լրատվամիջոցներով տեսանյութ էր շրջանառվում, որտեղ երևում է, որ ԿԲ կառավարման խորհրդի անդամները, մասնավորապես՝ Արտակ Մանուկյանը և ԿԲ նախագահի տեղակալը եղել են «Քաղաքացիական պայմանագիր» կուսակցության շտաբում։ Մինչդեռ ԿԲ-ի պաշտոնական կայքում սևով սպիտակի վրա գրված է, որ Կենտրոնական բանկի նախագահը, տեղակալները և խորհրդի այլ անդամներն իրենց լիազորությունների իրականացման ժամանակահատվածում չեն կարող լինել որևէ կուսակցության անդամ կամ որևէ այլ կերպ զբաղվել քաղաքական գործունեությամբ։